প্রভু যীশু খ্রীষ্টৱা জগতৱাই জনম সাই ফৗইঙি

প্রভু যীশু খ্রীষ্টৱা জগতৱাই জনম সাই ফৗইঙি

নাঙি পৰম পবিত্র প্রভু যীশু খ্রীষ্টনি মুঙাই বেবাকন নমস্কাৰ লাৱৌ। তিনিং ই সময়াই নাং আপাইসা আলোচনা গাসাইমৗন চৗইঙা প্রভু যীশু খ্রীষ্টৱা জগতৱাই জনম সাই ফৗইঙি। মাৰাবনি মাজাৰাই প্রভু যীশু খ্রীষ্ট আতাংনা গৗমৗন ফৗইতানা, প্রভু যীশু খ্রীষ্টৱা জগতৱাই জনম সাই ফৗইঙি, উৱো ইবায় নৗকঙা। 

আগষ্ট কৈসৰনি হুকুম

লুক ২:১-১৪ তাৰ।

হাসানি নৗতৗম ম্রাদো, নাঙি পৰম পবিত্র প্রভু যীশুনি মুঙাই নমস্কাৰ। লৗইতানি অনুস্হানাই লুকৱা সুকতানি পেনেম ক্রৌনি পৰথম অধ্যায়ো নাং চৗইতানা। তিনিং লুকৱা সুকতানি ২ নম্বৰ অধ্যায়ো নাং চৗইঙা।

ই ২ নম্বৰ অধ্যায়ো সায়ৌ প্রভু যীশু খ্রীষ্টৱা জগতৱাই জনম সাই ফৗইতানি ঘটনাদোনি বিষিনাই নাং নৗকা। ই ঘটনাৱো ৰোমীয় শাসনাই সুকতানি সায়া। পুৰুনভেৰ চাৰাই মাৰাবদো যীশুৱো চৗইফৗইঙি সময়নি বর্ণনা লাওতানি তৱা স্বৗর্গৗদূতদো ফৗইঙিমৗন অৗগ্রৗম।

যীশু জনম সাইঙি ৮ দিন জিকৗমাই উৱো যিৰূশালেমনি মন্দিৰাই লালাং সাইতানা, মোশিনি নিয়ম গানা হুচুৰ হান গৗমৗন। আৰা এনোক ইগিনা যিৰূশালেমাং লৗইতানা গৗমৗন নাং শিমিয়ন আৰা হান্নাহনি চায়দোবান মানা। যীশুনি পৗমৗৰাইঙি বিষিনাই খৗলি গকসৗন ক্রৌ নাঙা দুন্নি সাইতানা যে উম্রা সাধাৰণ মাৰাবদো গানান স্বাভাবিক বাবে চুংতানা। ই ক্রৌৱো নাং মানা ৫২ নম্বৰ তাৰাই। যীশুৱা জ্ঞানমৗন চুংতানা অর্থাৎ মানসিক ভাবে। আৰা বয়সাই অর্থাৎ শাৰাৰীক ভাবে আৰা ঈশ্বৰ আৰা মাৰাবনি মৗকৗৰাই অনুগ্রহৱাই বৃদ্ধি সাইমৗন পাংতানা অর্থাৎ আত্মিক ভাবে। নাং ই অধ্যায়নি বিষিনাই চৗই অৗগচাক আপাইসা কয়-একটা ক্রৌ নাং চৗইবুঙা।

নাং অৗগচাকৗন নায়মৗন ফৗয়ৌ যে, লুকৱা সুকতানি পেনেম ক্রৌৱো ঐতিহাসিক বিৱৰনি গানা আৰা ই পেনেম ক্রৌৱো বিশেষ বাবে সুকঙি সাইতানা গ্রীকদোনি চিন্তাধাৰামৗন আৰা শিক্ষীত্ব মাৰাবদো উদ্দেশ্য গাসাইমৗন মানে অনোকো দিংকিমৗন সুকঙি সাইতানা । উমৗন ই সুকতানি বিশেষ আত্মিক উদ্দেশ্য সায়ৌ ঈশ্বৰনি স্বা যীশু খ্রীষ্টনি ক্রৌ উপস্হাপন গাসাইঙি। অৗগচাকৱাইঙি সাকসা পণ্ডিত নিয়ান্দাৰনি ক্রৌৱাই "আতাম বিখ্যাত জৗতিয়া অৗপিনি ধৰণাই খ্রীষ্টিয় বিশ্বাস কায় গৗমৗন হা'ৱাই ফুতানা, যিহুদীদো অৱদান লাওতানামৗন ধর্মীয় নীতি নিয়মদো আগবাৰাই গৗমৗন। গ্রীকদো সহায় গাসাইতানা বিজ্ঞান আৰা কলাৱাই আৰা ৰোমীয়দো ৰাজনীতিকৱাই আগবাৰাইঙি সহায় গাসাইতানা।" মথি, মার্ক আৰা লুকৱা সুকতানি ই আতাম পেনেম ক্রৌৱো মাৰাবদোনি আতাম জৗতিনি উদ্দেশ্য লাইমৗন সুকতানি সায়া। মথি সুকতানি পেনেম ক্রৌৱো যিহুদীদো লাইমৗন আৰা মার্কৱা সুকতানি পেনেম ক্রৌৱো ৰোমীয়দো উদ্দেশ্য গাসাইমৗন আৰা লুকনি দ্বাৰাই সুকতানি পেনেম ক্রৌৱো গ্রীকদোনাই উদ্দেশ্য গাসাইমৗন সুকতানি সায়া।

ডাক্তৰ গ্রেগৰী সুকতানা, যে গ্রীকদো আ-আতাং জৗতিদোন চৗইবা আতাং দ্বীগতিয়া জৰাইমৗন। অৗগচাকৱাই অনোক প্রতিনিধিত্ব গাসাইতানা যুক্তি আৰা মানৱতামৗন। মাৰাব জৗতিয়ো সম্পুর্ণ গাসাইঙি কৗম যে অনোকৗন তৗৰৗই নিগিনা উগুনা অনোক শুংশুংতানামৗন। উ যুগাই অনোক ই সময় গানা গসা গদা মহানগৰ ই বিৰাট জনসমুদ্র গানা যিবাই মিশৃত্ব সাইতানি জৗতি আৰা মিশৃত্ব সংস্কৃতি গানা। অনোক আপ্রোঙি বায়দো মাৰাবনি মোহৰাইয়ৗন বানাইতানা। খৗলি মাৰাবনি মোহৰাইসৗন দংচা অৗপিনি ৰূপৱাইবান বানাইতানামৗন আৰা মাৰাবদোনি সংস্কৃতিদোমৗন সম্পুর্ণ জাগতিক বাবে আৰা ঈশ্বৰ-----

গ্রীকদো অবিদিত মানে দাসমাঞ্চা ঈশ্বৰনি গৗমৗন গসা বেদী বানাইমৗন তান্তানামৗন এথেঞ্চ নগৰাই। আৰা সাধু পৌলা অনোঙা উ অবিদিত মানে দাসমাঞ্চা ঈশ্বৰমৗন পৰিচয় গাসাই লাওতানা। আৰা উ অবিদিত ঈশ্বৰৗন সাইতানা প্রভু যীশু খ্রীষ্ট। পৌলমৗন অৗগ্রৗম ডাক্তৰ লুক বান লৗইতানা। উৱোন গৗমৗন গ্রীকদোনি কৗমদো আচলতে প্রভু যীশু খ্রীষ্টনি  আগমন গৗমৗন জগতৱো তৗয়াৰ গাসাই গানা সায়া। মাৰাব জৗতিনি মুক্তি আৰা সংস্কৃতকৰন গাসাই গৗমৗন যে মাৰাবনি যুক্তিদোসৗন যথেষ্ট দংচা ই ক্রৌৱো অনুভৱ গাসাই গৗমৗন আৰা স্বীকাৰ গাসাই গৗমৗন গ্রীক সংস্কৃতিয়োন বাধ্য গাসাইতানা। ই কৗম তৗৰৗই গৗমৗন সাকসা ফৗই নিগিনিয়ো সামাইমৗন পাঙিয়ো অনোক বাধ্য সাইতানা। গ্রীক ক্রৌ সাইতানা ঈশ্বৰনি ক্রৌ দাপ্লাকঙি গৗমৗন গসা ঘৗড়ী গানা। জগতনি মাহাঙাই খ্রীষ্টনি পেনেম ক্রৌ দাপ্লাক লাওতানা গ্রীক ক্রৌতিয়া। আৰা ই কৗমো সম্ভব গাসাই গৗমৗন ঈশ্বৰৗন অচলতে মহাবীৰ আলেকজেণ্ডাৰো ব্যৱহাৰ গাসাইতানামৗন। Howson ৱা ব্রাকতানা মহাবীৰ আলেকজেণ্ডাৰনি বিষিনাই ইগিনা "উম্রানি সাগৰনি উপকুলাই পাংতোঙি সভ্যতা জালনি তুক্রাকদো লাইমৗন উম্রা অভিজান গাসাইতানি হাদামদাই মিলৗই লৗইতানা। হথাৎৱাই প্রাইচো, পাসাইতো অৗগ্রৗম সাইজিনৌ। হেত্রাকৗইমৗন পাংতানি জৗতিদো গসা চৰকাৰনি অধিনাই পাং ফৗয়ৌ। ৰাজনিতিক জীৱননি কেন্দ্র হিচাৱাই পিদান নগৰদো বানাইঙি সাইতানা, ব্যৱসাই গাসাই গৗমৗন পিদান যোগাযোগ গাসাইঙি আৰাম্ভ সাইতানা। ই পিদান সংস্কৃতিয়ো পিসিদিয়া আৰা লাইকোনিয়াৱো দগক ফৗয়ৌ। টিগ্রিচ আৰা Euprates চিকাঝোৰো গ্রীকনি চিকাঝোৰ সাইফৗয়ৌ। এথেঞ্চনি ভাষাৱো বেবীলোনিয়াই যিহুদীদোনি পাংতোঙি হাদামাইবান  নানি সায়ৌ। আৰা মিশৰ দেশ জয় গাসাইমৗন গ্রীকদোনি গানা পিদান বেবীলোন বানাইতানামৗন আৰা উৱো মুং তান্তানামৗন আলেকজেণ্ডাৰীয়। ই নগৰ তিনিং লাগেত আলেকজেণ্ডাৰীয় ব্রাকাইমৗন দাসমানা।

তি ই সময় প্রভু যীশু খ্রীষ্টনি জনমনি বিষিনাই পঢ়াই সময়বান ই ক্রৌদো নাঙি মনাই দাপাং নিগা। বাইবেলাইপ্রিং আং পঢ়াই লাওঙা লুকৱা সুকতানি পেনেম ক্রৌ ২ অধ্যায়নি ১ আৰা ২ তাৰাই "উ সময়াই বেবাকৗন মুং সুকৗইমৗন লাওং গৗমৗন আগষ্ট কৈচৰ নাঙাইপ্রিং হুকুম সায়ৌ। ছিৰিয়া হাসঙাইঙি টাংগাম কুৰিনিয়নি দিনাই ইয়ৗন পৰথম মাৰাব লেখেনি সাইতানা।" বেবাকৗন মানে গ্রীক ক্রৌৱাই oikumene. অর্থাৎ মাৰাবনি হাসং পাংতোঙি জগতৱাইঙি ভৗগৗদো। অর্থাৎ উ সময় সভ্য জগতৱাইঙি ক্রৌদো ইবায় দেপ্রেংতিন তানা। উ সময় জগতৱাই তৗক্রৗই হাদামাই পাংতোঙাই অসভ্য আৰা বৰবৰ জৗতিদো নিশ্চয় আগষ্ট কৈসৰনি ই হুকুমাই ফৗইচান। ই আগষ্ট কৈসৰ চাংমৗন? উম্রা সাইতানা জুলিয়াচ সিজাৰনি স্বা বানাইতানি স্বা দংকা। উনি কৗন্তৗক মুঙো Octavianus সে মৗন আৰা উম্রা অৗপিন আপোন কৈসৰ ব্রাকাইমৗন তাক সাইতানা। উৱো তাং গৗমৗন উ অধিকাৰো উনায় নিশ্চয় তৱামৗন আৰা আগষ্টৱো মুং দংচামৗন নাত্নে গসা উপাধিসে। ৰোমনি ৰাজ সভা মানে সেনেট ৱাই আতাং উপাধিদোনি গৗমৗন লাইতানামৗন নাত্নে উম্রা উদো সৗনৗইচান। আৰা আপৗন ই আগষ্ট উপাধিয়ো লাইতানা। ই উপাধিয়ো ধার্মিক দিকৱাই গুৰুত্ব তৱা আৰা উম্রা আপাৱো ঈশ্বৰনি হাদামাই তান নাপতানামৗন। ডাক্তৰ লুকৱা ইবায় আগষ্টনি মুঙো ইতিন লাহাইচান। আগষ্ট কৈসৰা খৰদো হৰচক গৗমৗন গসা ৰাজ্য লাওতানামৗন। ৰোম সম্রায্যনি অধিনাই পাংতোঙি বেবাক জগতৱাইপ্রিং উম্রা  খাজানা হৰচক নাপ্তানামৗন। উনি গদা সম্রায্যৱো নিয়ন্ত্রণ গাসাই গৗমৗন উম্রা গসা গদা সেনা বাহিনি বানাই নাপতানামৗন। উৱোন গৗমৗন আৰা উমৗন আপৗন আৰামনি জীৱন গাসাইং গৗমৗন উম্রা ইগিনা খৰ হৰচক নাপতানামৗন আৰা উৱোন গৗমৗন আদেশ লাওতানা যাতে বেবাকৗন অৗপিনি মুংদো গুদুং লাৱা। ই ক্রৌ যে ঐতিহাসিক বাবে কৗন্তৗক উ ক্রৌৱো দেপ্রেং গৗমৗন লুকৱা ব্রাকতানা যে ই ঘটনাৱো সাইতানামৗন সিৰিয়া হাসঙাই ই টাংগাম Cyrenius নি দিনাই।

ই সময় ৩ তাৰাইপ্রিং ৭ তাৰ লাগেত পঢ়াইঙা, "উবাই মুং সুকতিন গৗমৗন, বেবাক মাৰাবন অৗপিন আপানি নগৰাঙা লৗয়ৌ। আৰা যোষেফবান উনা সৗংমৗন তানতানি মৰিয়মজুৱো অৗগ্রৗম লাইমৗন, উম্রাবান দায়ুদনি হুসুকৱান গৗমৗন গালীলাইঙি নাজাৰেথ নগৰাইপ্রিং যিহুদীৱাইঙি বৈৎলেহেম মুঙাই দায়ুদনি নগৰাং লৗয়ৌ। উ সময় উম্রাজু অকনাং। উম্রা উবায় পাংতোঙায়ৗন মৰিয়মজু স্বা জনমমি সময় পুৰা সাইমৗন, উনি পৰথম স্বা জনমৌ। আৰা উৱো গামচামৗন ফানাইমৗন মুশু হাৰচাক লাওঙি দংগাৱাই গুজৗইমৗন তানৌ, আতাঙা জুখু তঙি নৗগৌৱাই অনোঙি গৗমৗন হাদাম মাঞ্চৌ।" যোষেফ আৰা মৰিয়মজু গালীল হাদামাই যিহুদীদোনি বৈৎলেহেমাই ফৗইতানা। বৈৎলেহেম সায়ৌ দায়ুদনি নগৰ। যোষেফ দায়ুদনি হুসুকৱাইপ্রিং গৗমৗন দায়ুদনি নগৰাই মুং সুকঙি গৗমৗন লৗই নিগতানা। মৰিয়ম বান বৈৎলেহেমাই লৗই নিগতানা, কাৰণ মৰিয়ম বান দায়ুদনি হুসুক। ই খৗন্তৗক ঐতিহাসিক ঘটনানি বিষিনাই পঢ়াইৰৗন নাং আচৰিত সায়া জিকৗমাই ই ঘটনানি মাজাৰাই পাংতোঙি আত্মিক অৰ্থনি ক্রৌ চিন্তা গাসাইমৗন চৗইঙা। আগষ্ট কৈসৰ হুকুম লাওতান গৗমৗন মৰিয়মজু বৈৎলেহেমাং লৗই নিগতানা মুং সুক গৗমৗন আতাং আতাং মাৰাবদো গানা। নাত্নে ই মৰিয়মজুনি অকৱায়ৗন তৱামৗন ঈশ্বৰনি স্বা যীশু খ্রীষ্ট। মৰিয়ম মৗন অৗগ্রৗম ঈশ্বৰনি স্বা যীশু খ্রীষ্টবান বৈৎলেহেমাং লৗইতানা। আগষ্ট কৈসৰা আপাৱো মহা পৰক্রোমী ব্রাকাইমৗন শুংশুংতানামৗন। আপোন ঈশ্বৰমৗন সমান তাক নাপতানামৗন। নাত্নে তিনিং ই জগতৱো উনি ক্রৌ শুংশুংচা আৰা তৗক্রৗয়ৗন উনি মুংঙো দাসমাঞ্চা। নাত্নে মৰিয়মনি অকৱাই পাংতোঙি উ আনাওসৗন স্বাৱো তি তৗক্রৗই মাৰাবদো সিবৗইয়া আৰা উৱো ত্রাণকর্তা ব্রাকাইমৗন বিশ্বাস গাসায়া। আচলতে ঈশ্বৰৗন অগমি পৰিকল্পনাদো তৗৰৗইং গৗমৗন আগষ্ট কৈসৰো ব্যৱহাৰ গাসাইতানা। কাৰণ ঈশ্বৰা অৗগচাকৗন জানায় লাওতানা মীখা শুংসেতগীৰনি দ্বাৰাই যে জগতনি ত্রাণকর্তা যীশু খ্রীষ্টনি জনমো বৈৎলেহেমাই সাই নিগিনা। উৱোন গৗমৗন যি ঘটনাদো ঘটাইতানা ঈশ্বৰনি পৰিকল্পনা মতেসে ঘটাইতানা। আগষ্ট কৈসৰা খৗলি খাজানাসৗন লামতানা। নিগাৰৗন অকনাং মিচিকদো নানান কষ্ট সাইবেনেন গসা হাদামাইপ্রিং গসা হাদাম লাগেত লৗই নিগিনি সায়ৗন। নাত্নে উ আদেশনি দ্বাৰাই ঈশ্বৰা অৗপিনি পৰিকল্পনা তাকতানা। মৰিয়মনি বিষিনাই স্বা গৗলৗই প্রভু যীশু খ্রীষ্টনি বিষিনাই লুকৱা সুকতানি ক্রৌদো পঢ়াইমৗন নাং বুজৗই মানা যে প্রভু যীশুৱা সাধাৰণ মাৰাব স্বা হিসাবাই জনম সাই ফৗইতানা। উৱো মুসু হাৰচাক লাওঙি দংগাৱাই গামচামৗন ফানাইমৗন গুজৗইমৗন তানতানা। সাকসা সাধাৰণ মাৰাবনি ৰূপ লাইমৗন উম্রা জনম সাইতানা।

পুৰুন নাকৰদোনা দর্শন লাওঙি

৮ তাৰ "উ সময় উ হাদামাই পুৰুন নাকৰদো পাথাৰাই অৗপিনি পুৰুন পালদো নৗইমৗন পাংতা।" তৗক্রৗই মাৰাবদো প্রশ্ন সৗঙা যীশু খ্রীষ্টনি জনম বিসাই সাইতানা ব্রাকাইমৗন। নিশ্চয় খৗব চৗকতোঙি দিনাই জনম সাইচান কাৰণ খৗব চৗকঙি দিনৰৗন পুৰুন নাকৰদো ফাৰাই পুৰুন নৗইমৗন পাংচানমৗন। নাত্নে প্রভু যীশুনি কৗন্তৗক জনমনি তাৰিখৱো দৰকাৰ দংচা যিগিনান উৱো ক্রুশাই লাওঙি তাৰিখৱো দৰকাৰ দংচা। উম্রা বিসাই জনম সইতানা উৱো শাস্ত্রৱাই লাৱাইচান নাত্নে দৰকাৰী ক্রৌৱো ইয়ৗন যে উনি জনমো সাইতানা। ঠিক উগুনান উৱো বিসাই ক্রুশাই লাওঙি সাইতানা উ ক্রৌবান শাস্ত্রৱাই স্পষ্ট বাবে লাওৱাইচান। নাত্নে উম্রা যে ক্রুশাই চি'তানা উ ক্রৌসে নাঙি গৗমৗন খৗব দৰকাৰ। কাৰণ উম্রা নাঙি বেবাক পাপৱোন গৗন গৗমৗন ক্রুশাই অৗপিনি চৗল্পাক লাওতানা।

৯ প্রিং ১১ তাৰ লাগেত "উ সময়ৗন প্রভুনি দূত সাকসা ফৗইমৗন অনোঙি খৗতৗয়াই চাপ ফৗয়ৌ আৰা অনোকো দিগ্রৗইমৗন প্রভুনি মহিমা তৗনৗকৌ, উম্প্রিং অনোক খৗব খীৰৌ। নাত্নে দূতৱা অনোকো ব্রাকৌ, "তাখীৰ, আতাঙা চৗই, আং ননোং গৗমৗন খুসী মান্নি খবৰ দুন্তা; উ খুসী মান্নি বেবাক মাৰাবদোনি গৗমৗন সায়া; আতাঙা তিনিং দায়ুদনি নগৰাই ননোঙি গৗমৗন উদ্রাইংগীৰ জনমৌ, উম্রা খ্রীষ্ট।" যিকুনু স্বা গৗলৗই নৗকৰৗন নাঙি শুঙাই বুজৗই মাঞ্চা গানা গসা শুং ফৗয়া। নাং হাসানতৌ মাসা আৰা ঈশ্বৰবান উগুনা ৰূপৱাই জগতৱাই ফৗইতানা। উম্রা ইচ্ছা গাসাইৰৗন বৗলনাং ৰাজা গানা সাইমৗন জগতৱাই ফৗইমৗন। আৰা নাং দাসমানা প্রভু যীশু যি সময় দ্বিতীয় আগমনাই ফৗইঙা উম্রা সাকসা ৰাজা গানা সাইমৗন ফৗইঙা। গৌৰৱ আৰা মহিমামৗন পৰিপুর্ণ সাইমৗন ফৗইঙা। নাত্নে পৰথম বাৰাই দুর্ব্বল সাইমৗন ফৗইতানা কাৰণ স্বা গৗলৗইদো খৗব দুর্ব্বল সায়া। কিন্তু উম্রা স্বা গৗলৗই গানা সাইমৗন ফৗই বেনেন উম্রা উ ঈশ্বৰত্বৱো বাকাইমৗন ফৗইচান। উম্রা উনি গৌৰৱ আৰা মহিমাসে বাকাইমৗন ফৗইতানা। উৱো আদ্রায় গৗমৗন খৗলি কয়-একজন পুৰুন চাৰাই মাৰাবদো আৰা কয়-একজন স্বৗর্গৗদূতদোসৗন তৱা। নাত্নে বেবাক সৃষ্টিয়ৗন উৱো আদ্রাই গৗমৗন ফৗই নিগামৗন। মাৰাবদোনাইপ্রিং খৰ হৰচকৗইমৗন ব্যষ্ট পাং চৗইবা উ আগষ্ট কৈসৰবান ফৗই নিগামৗন যীশুৱো দবংনা গৗমৗন। প্রভু যীশু ইচ্ছা গাসাইৰৗন উ কৗমো তৗৰৗই গৗমৗন উৱো বাধ্য গাসাইমৗন। নাত্নে উগুনা তাকাইচান। প্রভু যীশুৱা অগমি ঈশ্বৰত্বৱো বাকাইচান। নাত্নে ঈশ্বৰ হিচাৱাই উনি যিপাংকায় সুবিধা তৱামৗন আৰা বিশেষ অধিকাৰদো উম্রা উদো বাকাইমৗন তান্তা ফৗইতানা। উম্রা ফৗইতানা সাকসা সাধাৰণ মাৰাব স্বা গানা।

১২ নম্বৰ তাৰ "আৰা ইয়োন ননোং গৗমৗন চিন্ সাইঙা যে, স্বাৱো গামচামৗন ফানাইমৗন মুশু হাৰচাক লাওঙি দংগাই গুজৗইতানি নৗকৗইঙা।" প্রভু যীশু যে সাধাৰণ মাৰাব সাইমৗন ফৗইতানা উ ক্রৌৱো নাং ইবায় আৰা নৗকা। উম্রা নাঙি দায় দোষ আৰা দুর্ব্বলতাদো বেবাকন অনুভৱ গাসাই মান্তানা। ঈশ্বৰা মাৰাবদো দাসমানা। উম্রা নৗঙো দাসমানা আৰা আঙোবান দাসমানা। নাঙি বেবাক ক্রৌৱোন উম্রা দাসমানা। কাৰণ উম্রা মাৰাব সাইমৗন ই জগতৱাই ফৗইতানা। উৱোন গৗমৗন নাংবান ঈশ্বৰ বিষিনাই নাংবা আপাইসা দাসমাননি সায়ৌ। কাৰণ উম্রা মাৰাব মোহৰাই  ফৗইতানা।

১৩ আৰা ১৪ নম্বৰ তাৰ, "জিকৗমাই তাপ্পৗন স্বৗর্গাইঙি গসা গদাগৗক হাঞ্জা উ দূতমৗন অৗগ্রৗম সাইমৗন ঈশ্বৰ প্রশংসা গাসাইমৗন ব্রাকৌ, স্বৗর্গাই ঈশ্বৰনি মহিমা আৰা বাসমাতাই, হাসানি মাৰাবনি মাজাৰাই শান্তি সায়ৗন।" তিনিং নাং শান্তিনি ক্রৌ ব্রাকাইমৗন পাঙা নাত্নে গসা ক্রৌ নাং মনাই দাপাং নিগা যে, "যিহোৱাৱৗন ব্রাকতানা হিচা মাৰাবদোনাই কুনু শান্তি তংচা।" যিশয়া ৪৮:২২।  হিচা মাৰাবদোনাই কুনু শান্তি তংচা আৰা ইগিনা মাৰাবদোনাই শান্তি সাই মাঞ্চা। নাং গসা মন্দ জগতৱাই পাংতা। নাং পাংতোঙি জগতৱো শয়তাননি দ্বাৰাই প্রভাবিত সাইতানা উৱোন গৗমৗন নাঙি জগতৱাই শান্তি তংচা। নাত্নে হাসানি মাৰাবদোনি মাজাৰাই শান্তি পাঙিয়ো সম্ভৱ। নৗং যুদি খ্রীষ্ট নাঙাই ফৗয়া আৰা নিনি ত্রাণকর্তা ব্রকাইমৗন গ্রহণ গাসায়া উগুৰৗন নাং ঈশ্বৰনি শান্তি মান্না। ৰোমীয় ৫:১ ৱাই ইগিনা সুকতানি তৱা "উনান গৗমৗন নাং বিশ্বাসমৗন ধার্ম্মিক ব্রাকাইমৗন লেকেন মাসৌৱান গৗমৗন নাঙি প্রভু যীশু খ্রীষ্টনি দ্বাৰাই ঈশ্বৰমৗন অৗগ্রৗম নাঙাই শান্তি তৱা।" প্রভু যীশু খ্রীষ্ট যি সময় ই জগতৱাই ফৗইতানা উম্রা ই জগতৱাই ই শান্তিয়োন লাহাইতানা। নাত্নে উনি দ্বিতীয় আগমনাই উম্রা ফৗইঙা শান্তিৰাজ সাইমৗন উ সময় উম্রা ই বেবাক জগতৱাই অধার্ম্মিকৱো তংচা তাকঙা। বেবাক বিদ্রোহদো দমন গাসাইঙা। উম্রা ই জগতৱাই শান্তিনি ৰাজ্য বানাইঙা। নাত্নে উনি দ্বিতীয় আগমণ সাইচা লাগেত জগতৱাই শান্তি সাইচানা। হাসানি নৗতৗম ম্রাদো ননোক প্রভু যীশু খ্রীষ্ট নিনি ত্রাণকর্তা ব্রাকাইমৗন বিশ্বাস গাসায়ৌ কনায়? প্রভু যীশুৱো গ্রহন গাসাইমৗন নৗং আৱা ঈশ্বৰনি শান্তি স্হাপন গাসায়ৌ কনায়? প্রভু যীশুৱো অৗপিনি শুঙাই হাদাম লাওমৗন ই জগতৱা লাও মাঞ্চা আৰা সেকাইমৗন লান মাঞ্চা উ শান্তিয়ো উপভোগ গাসাই মান্তা কনায়? আপাইসা চিন্তা গাসাইমৗন চৗইচিং!